Kabilang sa mga naninirahan sa Madīnah ay may mga iba pang taong nagpaiwan sa paglusob nang walang kadahilanan. Umamin sila sa mga sarili nila na sila ay hindi nagkaroon ng kadahilanan at hindi naglahad ng mga kadahilanang sinungaling. Ang mga gawa nilang maayos na nauna gaya ng pagsasagawa ng pagtalima kay Allāh, pananatili sa mga batas Niya, at pakikibaka ayon sa landas Niya ay inihalo nila sa gawang masagwa. Umaasa sila mula kay Allāh na tanggapin Niya sa kanila ang pagbabalik-loob at palampasin Niya sa kanila ang kasalan. Tunay na si Allāh ay Mapagpatawad sa sinumang nagbalik-loob sa Kanya kabilang sa mga lingkod Niya, Maawain sa kanila.