Kapag nagwakas kayo sa mga gawain ng ḥajj at natapos kayo sa mga ito ay mag-alaala kayo kay Allāh at magparami kayo ng pagbubunyi sa Kanya gaya ng pagmamalaki ninyo sa mga ninuno ninyo at pagbubunyi ninyo sa kanila o ng higit na matindi sa pag-alaala kay Allāh kaysa sa pag-alaala sa mga ninuno ninyo dahil ang bawat biyayang tinatamasa ninyo ay mula sa Kanya - kaluwalhatian sa Kanya at pagkataas-taas Siya. Ang mga tao ay mga nagkakaiba sapagkat kabilang sa kanila ang tagatangging sumampalataya at ang tagatambal, na hindi sumasampalataya kundi sa buhay na pangmundong ito kaya wala siyang hinihiling sa Panginoon niya kundi kaginhawahan nito at gayak nito gaya ng kalusugan, salapi, at anak. Wala silang bahagi mula sa inihanda ni Allāh para sa mga lingkod Niyang mga mananampalataya sa Kabilang-buhay dahil sa pagkaibig nila sa Mundo at pag-ayaw nila sa Kabilang-buhay.